Ընդդեմ կանանց նկատմամբ բռնության կոալիցիայի մասին․

«Ընդդեմ կանանց նկատմամբ բռնության» կոալիցիայի առաքելությունն է համատեղ ջանքերով նպաստել կանանց և աղջիկների նկատմամբ գենդերային բռնության նվազմանը՝ կանխարգելման և պաշտպանության մեխանիզմների ամրապնդման միջոցով։ Կոալիցիան առ այսօր արձագանքել է կանանց նկատմամբ բռնության բազում դեպքերի և հանրության լայն շերտերի իրազեկել է կանանց նկատմամբ բռնության համակարգային խնդրի մասին: Կոալիցիայի տարիների ջատագովման աշխատանքների արդյունքում՝ 2017թ. ընդունվեց ընտանեկան բռնությունը կանխարգելող և բռնության ենթարկված անձանց պաշտպանությունն ապահովող օրենք:

Ծրագրի նկարագրություն․

«Կին իրավապաշտպանները քայլեր են ձեռնարկում Հայաստանում գենդերային բռնության  դեմ» (2020-2022 թթ․) ծրագիրն իրականացվում է Ընդդեմ կանանց նկատմամբ բռնության կոալիցիայի կողմից Եվրոպական միության ֆինանսավորմամբ։ Ծրագրի ընդհանուր նպատակն է նպաստել Հայաստանում կանանց նկատմամբ բռնության վերացմանը:

Ծրագրային ուղղություններն են․

Ա․Պետության կողմից անհրաժեշտ օրենքների, քաղաքականությունների և մեխանիզմների ընդունումը՝ ուղղված կանանց ընտանեկան ու գենդերային բռնություններից պաշտպանությանն ու կանխարգելմանը, ինչպես նաև պետական մարմինների կարողությունների զարգացում՝ ապահովելու արդյունավետ, զգայուն և բազմաոլորտային արձագանք գենդերային բռնությանը։

Բ․ Բարձրացնել կանանց, քաղաքացիական հասարակության կազմակերպությունների և հասարակության իրազեկվածությունը ընտանեկան և գենդերային բռնության տարածվածության և առկա պաշտպանական մեխանիզմների վերաբերյալ:

Թատերական ներկայացման նպատակները․

«Ընդդեմ կանանց նկատմամբ բռնության» կոալիցիան ցանկանում է կանանց նկատմամբ բռնության թեմայով կազմակերպել թատերական բեմադրություն, որը կցուցադրի բռնության խնդիրն ու կանանց դիմադրական պայքարը։

Գործողության շրջանակներում անհրաժեշտ է՝

• Հեղինակել թատերական ներկայացման սցենար.
• Ձեռք բերել թատերական մեկ ներկայացման համար անհրաժեշտ աքսեսուարներ(հագուստ, դեկորացիաներ և այլ պարագաներ՝ ըստ անհրաժեշտության).
• Իրականացնել մեկ բեմադրություն գենդերային բռնության դեմ պայքարի 16-օրյակի շրջանակներում (2022թ․նոյեմբերի 25-դեկտեմբերի 10)։

Սցենարի հեղինակային իրավունքները պատկանելու են սցենարիստին, սակայն Ընդդեմ կանանց նկատմամբ բռնության կոալիցիան ձեռք է բերելու սցենարի օգտագործման իրավունք։

Դիմել կարող են ինչպես անհատ արվեստագետները, այնպես էլ ոլորտում գործունեություն ծավալող արվեստային կազմակերպությունները։

Դիմելու ընթացակարգ

Եթե անհատ եք, ուղարկեք Ձեր CV-ն, բեմադրված ներկայացման որևէ օրինակ և երկու կոնտակտային անձանց տվյալներ [email protected] հասցեին՝ նամակի վերնագրում նշելով «Ներկայացման բեմադրման մրցույթի հայտ»:

Եթե կազմակերպություն եք, ուղարկեք ձեր պորտֆոլիոն, կատարված աշխատանքների նմուշները կամ հղումները և երկու կոնտակտային անձանց տվյալներ [email protected] հասցեին՝ նամակի վերնագրում նշելով «Ներկայացման բեմադրման մրցույթի հայտ»:

Դիմումների վերջնաժամկետը փետրվարի 24-ն է: Ուշացած դիմումները չեն քննարկվի: Հաշվի առնելով դիմումների քանակը՝ կազմակերպությունը կապ կհաստատի միայն հարցազրույ­ցի փուլ անցած դիմորդների հետ: