«Ընդդեմ կանանց նկատմամբ բռնության կոալիցիա» ՀԿ-ն մշտապես հավատարիմ է բռնության բոլոր ձևերի, ներառյալ՝ սեռական ոտնձգությունների, շահագործման և ոչ պատշաճ վարքագծի հանդեպ զրոյական հանդուրժողականության իր քաղաքականությանը:
Հոկտեմբերի 21-ին Կոալիցիան գումարել է Խորհրդի արտահերթ նիստ, որի ընթացքում քննարկվել է անդամ կազմակերպություններից մեկի ներկայացուցչի կողմից սեռական ոտնձգության և սեռական բռնության մի քանի դեպքերի մասին ստացված տեղեկատվությունը։ Չնայած տուժողները որոշել են չդիմել իրավապահ մարմիններին, մենք պարտավոր ենք գործել պատասխանատու և թափանցիկ՝ կանխելու բռնության հետագա դրսևորումները և վերահաստատելու մեր հստակ դիրքորոշումը բռնության նկատմամբ:
Ղեկավարվելով «մի՛ վնասիր» սկզբունքով և հարգելով տուժողների գաղտնիության իրավունքը, մենք չենք հրապարակում մարդկանց վերաբերյալ որևէ տեղեկություն, որոնք առնչվում են վարքագծի խախտումներին:
Միևնույն ժամանակ, մենք ձեռնարկել ենք մի շարք քայլեր՝ ստացված տեղեկատվությանը արձագանքելու համար.
- Կոալիցիան հեռացրել է տվյալ անձին իր անդամների ցանկից։
- Կոալիցիան տեղեկացրել է բոլոր գործընկերներին և մարդու իրավունքների պաշտպանությամբ զբաղվող կազմակերպություններին այս որոշման և դրա հիմքերի մասին՝ հորդորելով նրանց պահպանել գաղտնիությունը, մինչ ներքին քննությունը ընթացքի մեջ է:
Այս առիթով ցանկանում ենք ևս մեկ անգամ շեշտել, որ մեր վարքականոնը պարտավորեցնում է անդամներին, աշխատակիցներին և կամավորներին պահպանել ամենաբարձր էթիկական չափանիշները և գործել Կոալիցիայի արժեքներին ու սկզբունքներին համապատասխան:
Լրացուցիչ տեղեկությունների կամ վարքագծի խախտման դեպքերի մասին զեկուցելու համար կարող եք դիմել [email protected]