«Ըննդեմ կանանց նկատմամբ բռնության կոալիցիան» հրավիրում է կանանց և աղջիկների դեմ բռնության թեմաներով ստեղծագործող արվեստագետներին՝ մասնակցելու «Կանանց դեմ ուղղված բռնության միջազգային օրվան»՝ նոյեմբերի 25-ին նվիրված ցուցադրությանը։ Ցուցադրությունը կկայանա Երևանի կենտրոնական պուրակներից մեկում /ԱԺ-ի մերձակա այգի, «Սիրահարների պուրակ», «Ազատության հրապարակ»/։ Մասնակցության համար խնդրում ենք դիմել մեզ մինչև նոյեմբերի 16-ը, հետևյալ հասցեով՝ [email protected], վերնագրում նշելով «ցուցադրություն» բառը։ «Ընդդեմ կանանց նկատմամբ բռնության կոալիցիան» տրամադրում է աջակցություն՝ արվեստագետների աշխատանքների տպագրության և այլ տեխնիկական այլ խնդիրների լուծման համար։
«Կանանց դեմ ուղղված բռնության միջազգային օրվա»՝ նոյեմբերի 25-ի խորհուրդը
«Ընդդեմ գենդերային բռնության 16-օրյակ»-ը համաշխարհային շարժում է, որն ուղղված է կանանց դեմ բռնության բոլոր ձևերի վերացմանը: Նոյեմբերի 25-ից մինչև դեկտեմբերի 10-ն անցկացվող միջոցառումների շրջանակում մարդկությունը համատեղում է իր ջանքերն ըննդեմ գենդերային բռնության։ Քարոզարշավը տարեցտարի նոր թափ է ստանում, 16-օրյակի շրջանակներում ակտիվիստները, գիտնականները և քաղաքական գործիչները միավորվում են՝ պայքարելու գենդերային հիմքով բռնության դեմ։ 1991 թվականից ի վեր, բազմաթիվ երկրների ակտիվ խմբեր իրականացնում են «Ընդդեմ գենդերային բռնության ակտիվության 16-օրյակի» համամոլորակային քարոզարշավներ։ Հայաստանն այդպիսի արշավներ իրականացնում է 2001 թվականից և նպատակադրվել է բարձրացնել գենդերային բռնության և նրա բոլոր տարատեսակների մասին բնակչության իրազեկությունը, բացահայտել Հայաստանում կանանց իրավունքների չճանաչված խախտումները և փոխել վերաբերմունքը կանանց և աղջիկների դեմ ուղղված բռնության նկատմամբ։
Քարոզարշավը ներառում է հետևյալ հիշարժան օրերը՝
- նոյեմբերի 25 – Կանանց դեմ ուղղված բռնության վերացման միջազգային օր,
- նոյեմբերի 29 – Կին իրավապաշտպանների միջազգային օր,
- դեկտեմբերի 1 – ՁԻԱՀ-ի համաշխարհային օր,
- դեկտեմբերի 2 – Ստրկության վերացման միջազգային օր,
- դեկտեմբերի 6 – Մոնրեալի սպանդի տարելից
- դեկտեմբերի 10 – Մարդու իրավունքների միջազգային օր։